បងប្អូនយល់យ៉ាងណា? រូបភាពប៉ូលិស​ស្រី​មួយ​រូប​បីកូន​តូច​ក្នុង​ដៃ និង​បំ​ប៉ៅ​ដោះ​កូន​ នៅ​ហ្នឹងកន្លែង​ធ្វើការ​ ជាប្រធានបទជជែកពេញបណ្ដាយសង្គម…សូមជួយបញ្ចេញមតិផង!

(ស្ទឹងត្រែង)៖ រូបភាព​មួយ​សន្លឹក​បង្ហាញ​ពី​ប៉ូលិស​ស្រី​មួយ​រូប​បីកូន​តូច​ក្នុង​ដៃ និង​បំ​ប៉ៅ​ដោះ​កូន​ផង នៅ​ទីកន្លែង​ធ្វើការ​មួយ ព្រម​ជាមួយនឹង​ការ​ស្លៀក​ឈុត​ឯកសណ្ឋាន​ជា​ប៉ូលិស​កំពុង​ទទួល​ការ​ចាប់អារម្មណ៍​ពី​មហាជន​លើ​បណ្តាញ​សង្គម​យ៉ាង​ខ្លាំងក្លា​ប៉ុន្មាន​ថ្ងៃ​កន្លង​មកនេះ ដោយ​ភាគច្រើន​ពោល​សរសើរ​ថា នាង​ពិតជា​ស្ត្រី​គម្រូ​មួយ​រូប​ដែល​ខិតខំ​បំពេញការងារ​ហើយ ខំប្រឹង​មើលថែ​ទាំ​កូន​ទៀត។

រូបភាព​មួយ​សន្លឹក​បង្ហាញ​ពី​ស្ត្រី​ប៉ូលិស​ស្រី​អង្គុយ​លើ​កៅអី ដៃ​ម្ខាង​បីកូន​តូច និង​បំ​ប៉ៅ​កូន នៅ​ចំណុច​គោលដៅ​មួយ​កន្លែង កំពុង​ត្រូវ​បាន​អ្នកលេង​បណ្តាញ​សង្គម​ជជែក​ដេញដោល​យ៉ាង​ខ្លាំង​នោះ គឺជា​រូបភាព​របស់អនុសេនីយ៍ទោ ស៊ី​ថុ​ង សុខា ដែល​ស្ត្រី​ប៉ូលិស​រូប​នេះ​បាន​បង្ហោះ​លើ​បណ្តាញ​សង្គម​ហ្វេ​ស​ប៊ុ​ក​របស់​នាង​កាលពី​ថ្ងៃ​ទី​២ ខែមីនាកន្លង​ទៅ អម​ជាមួយនឹង​ខ្លឹមសារ​សរសេរ​ថា

«​ព្រោះតែ​ពាក្យ​ថា​ម្តាយ មិន​ថា​ក្នុង​កាលៈទេសៈ​ណា​ទេ ដើម្បី​កូន​ភ្លេច​អស់​ភាព​អៀនខ្មាស់ (​នេះ​ហើយ​ជីវិត​ពិត​)»។ ក៏​ប៉ុន្តែ​មិនដឹង​ថា ក្រោយ​ការ​បង្ហោះ​រូបភាព​ខាងលើ​នេះ​ហើយ អ្នក​នាងអនុសេនីយ៍ទោ ស៊ី​ថុ​ង សុខា ត្រូវ​រង​ការ​ស្តីបន្ទោស​ពី​ខាង​ណា​នោះ​ទេ ស្រាប់តែ​កាលពី​រាត្រី​ថ្ងៃ​ទី​៦ខែមីនា នាង​បាន​បង្ហោះ​សារ​ថ្មី​មួយទៀត​លើ​គណនី​ហ្វេ​ស​ប៊ុ​ក​របស់​នាង ដោយ​ពោល​ពាក្យ​ថា

«​នាង​ខ្ញុំ​អនុសេនីយ៍ទោ ស៊ី​ថុ​ង សុខា អត្តលេខ​71655 សូម​ចេញ​មុខ​សុំ​ទោស​ជា​សារ​ធារ​ណៈ​ក្នុង FACE BOOK ចំពោះ​ការ​ផុស​រូបភាព​បំបៅ​ដោះ​កូន​នៅ​កន្លែងធ្វើការ និង​ស្លៀក​ឈុត​ឯកសណ្ឋាន​កាលពី​ថ្ងៃ​ទី​02/03/2021​កន្លង​មកនេះ​» ។ អ្នក​ម្តាយ​រូប​នេះ​បាន​បន្ត​ថា «​ការ​ផុស​ទៅ​នេះ នាង​ខ្ញុំ​ពុំ​មាន​គោលបំណង​ធ្វើ​អោយ​ប៉ះពាល់​ដល់​កិត្តិយស​អង្គភាព​នគរបាល ព្រមទាំង​ប៉ះពាល់​ដល់​កិត្តិយស​ស្ត្រី​ខ្មែរ​ទេ​។ អាស្រ័យ​ដូចនេះ សូម​អង្គភាព និង​ថ្នាក់ដឹកនាំ​គ្រប់​ជាន់ថ្នាក់​មេត្តា​ដោយ​ក្តី​អនុគ្រោះ​»។

ជាមួយនឹង​ការ​បង្ហោះ​សារ​សុំ​ការ​អភ័យទោស​ពី​មហាជន ចំពោះ​ការ​បង្ហោះ​រូបភាព​ខាងលើ​នេះ អ្នក​ម្តាយ​រូប​នេះ​ហាក់​ទទួល​បានការ​កោតសរសើរ​ពី​មហាជន ជា​ជាង​រង​នូវ​ការ​ស្តីបន្ទោស ព្រោះ​ក្រោយ​ពី​ការ​បង្ហោះ​រូបភាព និង​សារ​សុំ​ការ​អនុគ្រោះ​ពី​មហាជន​នោះ គឺ​ឃើញ​មាន​បងប្អូន​អ្នក​លេង​បណ្តាញ​សង្គម​ចែកចាយ​យ៉ាង​ផុសផុល និង​ចូល​បញ្ចេញ​ទស្សនៈ​គាំទ្រ​រូប​នាង​ទៅ​វិញ៕ ចុះប្រិយមិត្តវិញយល់យ៉ាងណាដែរ?